အခုလို Covid-19 ကမ္ဘာအနှံ့ဖြစ်ပွားနေတဲ့အချိန်မှာ သန်းနဲ့ချီတဲ့အလုပ်တွေဟာလည်း remote work အဖြစ်ကိုရုတ်ချည်းပြောင်းရွေ့လိုက်ရပါတယ်။ ဒီလိုအခြေအနေမှာမှာ အလုပ်ရှင်တွေအနေနဲ့ ဝန်ထမ်းတွေရဲ့ productivity ကိုထိန်းသိမ်းနိုင်ဖို့ စိုးရိမ်လာတယ်ဆိုတာအံ့သြစရာမဟုတ်ပါဘူး။ ဒါပေမယ့် အလုပ်ရှင်တွေအနေနဲ့ ဒီလိုမကြုံဖူးတဲ့အခြေအနေမှာ တကယ်စိုးရိမ်သင့်တဲ့ရေရှည်အန္တရာယ်က Employee Burnout ပါပဲ။ Employee Burnout ဆိုတာလူတစ်ယောက်က သူ့ရဲ့အလုပ်ကို အလွန်အမင်းစိတ်ဖိစီးမှုများပြီး စိတ်ပျက်စရာအနေနဲ့ ခံစားရတာကိုဆိုလိုပါတယ်။ 

ဒီလိုကိစ္စကတကယ်ပဲအဖြစ်များပါတယ်။ အလုပ်နဲ့အလုပ်မဟုတ်တဲ့တခြားကိစ္စတွေကြားကစည်းဟာ ပုံမှန်ဖြစ်လေ့မရှိတဲ့နည်းအသစ်တွေနဲ့ မှုန်ဝါးလာရပါတယ်။ အခုမှပထမဆုံးအကြိမ် Work From Home လုပ်ဖူးတဲ့ဝန်ထမ်းတွေအနေနဲ့လည်း သူတို့ရဲ့ Professional နဲ့ Personal ဘဝတွေကြားကစည်းတွေကို ထိန်းသိမ်းဖို့ရုန်းကန်လာရပါတယ်။ သူတို့ရဲ့အလုပ်ထဲသစ္စာရှိမှု၊ စိတ်နှစ်နိုင်မှု Productivity တွေကိုပြဖို့ တစ်ချိန်လုံးအလုပ်လုပ်ရမယ်လို့ခံစားလာရနိုင်ပါတယ်။ 

အကျိုးဆက်အနေနဲ့ နေ့လည်ကညနေ ရုံးတတ်ရက်နဲ့ရုံးပိတ်ရက်တွေကရောပြီး ကိုယ်ပိုင်အချိန်ဆိုတာတဖြည်းဖြည်းနဲ့ ပျောက်ကွယ်လာပါတယ်။ အထူးသဖြင့် အလုပ်တစ်ဖက်နဲ့မိဘတွေနဲ့ ဝင်ငွေနည်းတဲ့ဝန်ထမ်းတွေအတွက်  ဒီလိုအချိန်ဟာ ပိုပြီးစိတ်ပင်ပန်းစရာဖြစ်ပါတယ်။ ဒီလို Work From Home Burnout ကိုရှောင်လွှဲနိုင်အောင် HR expert, Denise Broady ကအကြံပေးချက်(၃)ချက်ကိုပြောပြထားပါတယ်။

1. Routine တစ်ခုကိုဖန်တီးပါ။

ကိုယ့်ရဲ့တကယ့်ရုံးခန်းနေရာမှာမဟုတ်ရင်တောင် routine တစ်ခုရှိဖို့ကအရမ်းအရေးပါပါတယ်။ အလုပ်လုပ်တဲ့အချိန်ရောက်ပြီဆိုရင် အလုပ်နဲ့သင့်တော်တဲ့အဝတ်အစားမျိုးဝတ်ပါ။ ညအိပ်ဝတ်ကနေမဖြစ်မနေတေ့ာလဲပါ။ ကိုယ့်အိမ်ကစားပွဲကို ရုံးကစားပွဲလို့မှတ်ပြီးအလုပ်လုပ်ပါ။ ကိုယ့်အလုပ်ချိန်နဲ့ကိုယ်ပိုင်အချိန်ကို သီးသန့်နာရီအပိုင်းအခြားထားပါ။ ဒီလို routine တစ်ခုကိုဖန်တီးပြီးလိုက်လုပ်တာဟာ Work From Home Burnout ကိုကာကွယ်နိုင်ပြီး စိတ်ကိုတက်ကြွစေတဲ့အဓိကသေ့ာချက်လို့ Broady ကအကြံပြုထားပါတယ်။

2. စည်းသတ်မှတ်ပါ။ 

Work From Home သမားတွေ productive ဖြစ်ဖို့ စည်းသတ်မှတ်တာက အရေးကြီးတဲ့အစိတ်အပိုင်းကပါပါတယ်။ ကိုယ်ဟာမိသားစုဝင်သို့မဟုတ်တခြားသူတွေနဲ့နေတဲ့သူဆိုရင် သူတို့နဲ့ကိုယ်ရဲ့ကြားမှာစည်းတွေသေချာပေါက် သတ်မှတ်မှရပါမယ်။ ဥပမာအားဖြင့် ကိုယ်ကတံခါးဖွင့်ပြီးဖုန်းပြောနေတယ်ဆိုရင်တောင် ဝင်ပြီးနှောက်ယှက်လို့ရတဲ့အခြေအနေမဟုတ်မှန်း ကိုယ်နဲ့နေသူတွေသိအောင်ပြောထားပါ။ နောက်တစ်ခုကတော့ အလုပ်လုပ်တဲ့စားပွဲမှာ နေ့လည်စာမစားပါနဲ့။ အစာစားတဲ့အချိန်မှာ ကိုယ့်အလုပ်ကိုခေါင်းထဲကထုတ်လိုက်ပါ။ သတိထားရမှာကတေ့ာ တခြားသူတွေနဲ့ထိပ်တိုက်ရင်ဆိုင်ရတာတွေနဲ့ စိတ်ညစ်စရာတွေဖြစ်လာတာကိုရှောင်လွှဲနိုင်ဖို့ ကိုယ့်ရဲ့သတ်မှတ်မှုတွေက ကျိုးကြောင်းဆီလျော်တဲ့စည်းတွေဖြစ်ပါစေ။ 

3. Self-care ကျင့်သုံးပါ။ 

နောက်ဆုံးအရေးကြီးဆုံးတစ်ချက်ကတော့ ကိုယ့်ကိုကိုယ်ကောင်းပေးဖို့အတွက် အချိန်သက်သက်ဖယ်ထားပါ။ တစ်နေ့မှာတစ်နှာရီနှစ်နာရီစာဖတ်ဖို့၊ လေ့ကျင့်ခန်းလုပ်ဖို့၊ ပြေးဖို့မဟုတ်ရင် ကိုယ်လုပ်ချင်တဲ့ဝါသနာပါရာတစ်ခုခုလုပ်ဖို့ အချိန်ဖယ်ပါ။ အလုပ်နဲ့မပတ်သက်တဲ့လုပ်ဆောင်မှုကို မဖြစ်မနေ ကိုယ့်ရဲ့တစ်နေတာမှာပါဝင်အောင်လုပ်ပါ။  ဒါဟာကိုယ့်ရဲ့အလုပ်မှာအောင်မြင်ဖို့ အထောက်အကူပြုပါလိမ့်မယ်။ ဥပမာအားဖြင့်စာအုပ်ဖတ်ခြင်းက အလုပ်အတွက် ကောင်းမွန်တဲ့အကြံဥာဏ်တစ်ခုထွက်လာနိုင်စေသလို၊ လေ့ကျင့်ခန်းလုပ်ခြင်းဟာလည်း အလုပ်ကရတဲ့စိတ်ဖိစီးမှုတွေကို ပြေပျောက်စေပါတယ်။ အဓိကကတေ့ာ ကိုယ်ထိန်းချုပ်နိုင်တဲ့အရာတွေကိုပါ အာရုံစိုက်ပါ။